Հայաստանից «քաղհասարակութեան» հինգ ներկայացուցիչ մեկնել է Բաքու
«Կառավարութիւնը «հայկական» պատւիրակութեան փոխադրումը ուղիղ չւերթով կազմակերպելու համար յատկացրել է 17.5 միլիոն դրամ, իսկ այցի նպատակը հիմնաւորել են իբրեւ երկու պետութիւնների հասարակութիւնների միջեւ վստահութեան ձեւաւորում»։ Այս մասին հաղորդում է arfd.am-ը:
«Բաքւում շարունակւում է Արցախի ռազմաքաղաքական ղեկավարութեան եւ միւս գերիների գործերով շինծու դատավարութիւնը, եւ մի քանի օր առաջ Ադրբեջանի դատախազութիւնը դատարանից պահանջել է Արայիկ Յարութիւնեանին, Դաւիթ Իշխանեանին, Դաւիթ Մանուկեանին, Լեւոն Մնացականեանին, Դաւիթ Բաբայեանին ցմահ ազատազրկում, իսկ մեր միւս հայրենակիցներին՝ 16-20 տարի։
Մինչդեռ Բաքւում գտնւող քաղհասարակութեան ներկայացուցիչներն արդէն յայտարարել են, որ ծրագրում գերիներին այցելելու օրակարգ չկայ։
Իրականում սա ոչ թէ երկու ժողովուրդների միջեւ վստահութեան ձեւաւորմանն ուղղւած քայլ է, այլ Ալիեւի արիւնոտ ձեռքերը լւանալու, Արցախում տեղի ունեցած էթնիկ զտումը եւ ցեղասպանութիւնը լեգիտիմացնելու փորձ։
Նւաստացման, ստորացման եւ անարդարութեան պայմաններում, վախի եւ սպառնալիքի տակ ոչ խաղաղութիւն են կառուցում ոչ էլ վստահութիւն ձեւաւորում։
Ալիեւի եւ նրա յանցակից Փաշինեանի նշեալ բոլոր փորձերը ձախողւած են։ Պէտք է արձանագրել, որ ադրբեջանական կողմը ընդամէնը բաց հանդիպում է ունեցել իր ազդեցութեան գործակալների հետ. դրանք հայ ժողովրդի եւ Հայաստանի քաղհասարակութեան հետ ոչ մի կապ չունեն»:
ԻՇԽԱՆ ՍԱՂԱԹԷԼԵԱՆ
ՀՅԴ Հայաստանի Գերագոյն մարմնի ներկայացուցիչ,
ՀՀ ԱԺ «Հայաստան» խմբակցութեան պատգամաւոր
