Ի՞նչ հասկանալ Վաղարշապատի ընտրութեան արդիւնքից. Աբրահամ Գասպարեան
Լրագրող, քաղաքագէտ Աբրահամ Գասպարեանը Ֆեյսբուքի իր էջում «Ի՞նչ հասկանալ Վաղարշապատի ընտրութեան արդիւնքից» վերտառութեամբ հրապարակում է արել, որում մասնաւորապէս նշել է.
«1․ Չթերագնահատէ՛լ ընդդիմութեանը. աւագանիում ՔՊ-ի թուային գերակշռութիւնն առաջիկայում կանցնի լուրջ փորձաքննութիւն: Իշխանութեան՝ հնամաշ յանգերգով ընտրող որսալու՝ արդէն ձանձրալի գործելաոճն անցեալում է:
2․ Իշխանութեան վստահ յաղթանակին այլեւս չէն օգնում կեղծ «գերհերոսները»՝ իրենց սրտիկներով, ՖԲ ալգորիթմներով եւ վիրտուալ քաղաքական կրկէսային ներկայացումներով: Համենանդէպս, «Մանուել տապալած» քաղաք Էջմիածինն ընդդիմանում է իշխանութեան սնամէջ քարոզչութեանը, հակաեկեղեցական կեցուածքին, կոռուպցիոն հեղինակութեանն ու անարդիւնաւետ կառավարմանը:
3․ Ընդդիմութեանը փողոցում չաջակցել՝ դեռ չի նշանակում կորցնել ազգային մօտալուտ աղէտը ողնաշարով զգալու կարողութիւնը: Մարդիկ կարող են չբղաւել, բայցեւ չքուէարկել իշխանութեան օգտին՝ հակառակ ճնշումներին:
4․ Ընտրական մասնակցութեան բարձր ցուցանիշը կարող է փոխել յետագայ իրադարձութիւնների ընթացքը:
5․ Վաղարշապատում ՔՊ-ի ընտրական յաջողութեան շարժիչ ուժը ոչ թէ իշխանութեան հանրապետական հեղինակութեան գործոնն է, այլ թեկնածուի անձնական քուէն (personal vote), որը պայմանաւորուած է թեկնածուի սոցիալական կապերով, «տոհմիկ» ազգանուան հնչեղութեամբ կամ ազդեցութեամբ։ Սա ակնյայտօրէն խօսում է «իզմերի» իբրեւ թէ չհաւատացող ՔՊ-ի կուսակցական ինստիտուցիոնալացման թուլութեան ցուցիչների խորացման մասին, որտեղ կուսակցութիւնը չի կարողանում իր հեղինակութիւնն ու ազդեցութիւնը վերարտադրել տեղական մակարդակում, համենանդէպս՝ քաղաքներում։
Հիասթափուել չկայ՛, յուսահատուել չկայ՛, միայն յամառ ու հետեւողական աշխատանք: Ապրի՛ ընդդիմութիւնը, որ աշխատեց գրագէտ: Պիտի անել աւելի՛ն: Յաղթանակները կերտւում են՝ սայթաքումներից եւ ձախողումներից դասէր քաղելով: Գործող վարչախումբը գաղափարապէս սնանկ է, բնոյթով՝ հեշտ կոտրուող, ռեսուրսով՝ հարուստ, բայց ռեպրեսիւ: Ազգի կամքը չի ծնկում ոչ մի բռնաճնշող մեքենայի առջեւ: Պի՛նդ եղեք»:
