azatutyun.amի թղթակից Ռուզաննա Ստեփանեանի հաղորդման համաձայն 44-օրեայ պատերազմի քննիչ յանձնաժողովի զեկոյցին խորհրդարանի գաղտնի բաժնում առաջինը ծանօթացած ընդդիմադիր պատգամաւոր Գեղամ Մանուկեանն այսպէս է բնութագրում 215 էջից բաղկացած փաստաթուղթը: «Յայտնի խօսք կայ՝ յանցագործութեան բացայայտման մէջ ամենակարեւորը ինքդ քո հետքի վրայ չհելնելն է: Այդ նախադասութիւնը յատուկ եմ օգտագործում», – ասաց նա:
Ի վերջոյ, զեկոյցում տրուե՞լ են գլխաւոր հարցերի պատասխանները, ո՞րն էր 2020-ի պատերազմի պարտութեան պատճառը, եւ ո՞վ էր գլխաւոր պատասխանատուն, արդյօք գնահատականներ տրուե՞լ են պատերազմի ժամանակ գերագոյն հրամանատար, վարչապետ Փաշինեանի գործողութիւններին:
Փաստաթղթի գաղտնիութեան ռեժիմը հաշուի առնելով՝ խորհրդարանի պաշտպանութեան յանձնաժողովի ընդդիմադիր պատգամաւորը փակագծեր չբացեց, բայց նշեց, որ զեկոյցին ծանօթանալուց յետոյ սկսել է իրաւապահներին հարցումներ ուղարկել:
«Գլխաւոր դատախազ երէկ երկու հատ ուղարկել եմ, Քննչական կոմիտէ երկու հատ ուղարկել եմ, այսօր ուղարկելու եմ Ազգային անվտանգութեան ծառայութիւն խիստ կարեւոր երկու հաստատման հետ կապուած, որը կարող է ատոմային ռումբի ազդեցութիւն ունենալ Հայաստանում: <> Հարցադրումներ շատ կան {վարչապետի} եւ՛ կադրային նշանակման, եւ՛ ռազմավարական որոշումներ կայացնելու», – նշեց նա:
Գեղամ Մանուկեանն ասաց, որ 2022-ին, երբ ստեղծուեց 44-օրեայ պատերազմի հանգամանքներն ուսումնասիրող քննիչ յանձնաժողովը, իշխանութեան քաղաքական նպատակն էր այլոց մեղաւոր կարգելով՝ «հրեշտակի թեւեր հագցնել ու մաքրագործել» Նիկոլ Փաշինեանին, սակայն նրա պնդմամբ՝ քննիչ յանձնաժողովի զեկոյցում դա անել չի յաջողուել:
«Ազատութեան» հարցին, թէ զեկոյցում «մաքրագործուա՞ծ էր» Նիկոլ Փաշինեանը, Մանուկեանը պատասխանեց. «Չէ, ես պատահական չձեւակերպեցի, յանցագործութեան բացայայտման մէջ ամենակարեւորը սեփական հետքի վրայ դուրս չգալն է»:
Իսկ արդյօք դա՞ է պատճառը, որ խորհրդարանի լիագումար նիստում չընդգրկուեց զեկոյցը, պատգամաւորն արձագանքեց. «Դա դիմեք Ալէն Սիմոնեանին, որը ներկայացնում է, թէ ժամկէտներ են խախտուել: Ժամկէտներն արդէն 2 տարի խախտել են»:
44-օրեայ քննիչ յանձնաժողովի զեկոյցը, որը ըստ սահմանուած կարգի պէտք է ներկայացուեր խորհրդարանի լիագումար նիստում, ԱԺ նախագահի որոշմամբ ուղարկուեց գաղտնի բաժին:
Ալէն Սիմոնեանի բացատրութիւնն այն էր, որ քննիչ յանձնաժողովի զեկոյցի ժամկէտները խախտուել են, եւ հետեւաբար այն անհնար է ներառել լիագումար նիստէրի օրակարգում: Մինչդեռ, երբ Պաշտպանութեան յանձնաժողովի նախագահ Անդրանիկ Քոչարեանը պարբերաբար յետաձգում էր զեկոյցի հրապարակման ժամկէտները, իշխանութեան որեւէ ներկայացուցիչ չէր ահազանգում, որ ժամկէտներ են խախտւում:
Քննիչ յանձնաժողովի զեկոյցը իշխանական բոլոր պատգամաւորները չէն ստորագրել
Այս որոշման դրդապատճառներին չցանկանալով անդրադառնալ՝ ընդդիմադիր «Հայաստան» խմբակցութեան պատգամաւորն ամէն դէպքում նկատում է՝ առանց Նիկոլ Փաշինեանի որեւէ որոշում չի կայացւում. «Ես չեմ կարծում, որ առանց Նիկոլ Փաշինեանի իշխանական համակարգում որեւէ ճանճ բզզայ»
Ի դէպ, քննիչ յանձնաժողովի զեկոյցին ծանօթանալիս Գեղամ Մանուկեանն արձանագրել է, որ փաստաթղթի տակ ստորագրել են յանձնաժողովի իշխանական ոչ բոլոր պատգամաւորները: Զեկոյցի տակ դրուած է ընդամէնը 4 պատգամաւորի՝ յանձնաժողովի նախագահ Անդրանիկ Քոչարեանի, նրա տեղակալ Արմէն Խաչատրեանի, Վահագն Ալեքսանեանի ու Գագիկ Մելքոնեանի ստորագրութիւնները:
Ինչո՞ւ քննիչ յանձնաժողովի իշխանական միւս պատգամաւորները՝ Քրիստինէ Պողոսեանը, Հայկ Սարգսեանը, չէն ստորագրել զեկոյցը. նրանցից մենաբանութիւն ստանալ այսօր չյաջողուեց, նրանք անպատասխան թողեցին մեր զանգերը: Քրիստինէ Պողոսեանն օրերս «Ժողւուրդ» օրաթերթին ասել էր, թէ իրեն առաջարկել են զեկոյցի տակ ստորագրել առանց բովանդակութեանը ծանօթանալու: Այդ առաջարկը, սակայն, մերժել է:
