Փաստաբան Ռոման Երիցեանն իր ֆեյսբուքեան էջում հրապարակել է ԱՀ նախագահի հրամանագիրը` որով անուաւեր է ճանաչուել 2023 թուականի սեպտեմբերի 26-ին ստորագրուած Արցախը լուծարելու մասին հրամանագիրը։
Յարգելի՛ հայրենակիցներ
Վստահ եմ՝ շատերդ գիտեք կամ հասկանում եք Արցախի նախագահ Սամուել Շահրամանեանի կողմից հայկական երկրորդ պետութիւնը լուծարելու վերաբերեալ հրամանագիր կայացնելու դրդապատճառները։ Ոմանք նաեւ պատկերացնում են, որ որեւէ պաշտօնեայ, այդ թւում՝ պետութեան ղեկավարը, հրամանագրով պետութիւն լուծարելու լիազօրութիւն չունի։
Այնուամենանիւ, հանրութեան տարբեր շրջանակներ, հաշուի չառնելով անգամ այն, որ, այսպէս կոչուած, Արցախը լուծարելու վերաբերեալ հրամանագիրը,
որպէս իրաւական ակտ, անգամ ուժի մէջ չի մտել, տարբեր եղանակներով շահարկել են այն, Սամուել Շահրամանեանին անուանել Արցախը լուծարող նախագահ եւ այլն։
Աւելին՝ յենուելով հրամանագրի բովանդակութեան վրայ՝ ՀՀ-ում տարբեր անձանց, այդ թւում՝ արցախեան համայնքների ղեկավարներին եւ աւագանու անդամներին առաջադրուել են քրէական մեղադրանքներ՝ պատճառաբանելով, որ Արցախի պետութիւնն ու համայնքները լուծարուած են, իսկ պաշտօնատար անձանց լիազօրութիւններն էլ դադարեցուած, հետեւաբար նրանց կողմից այս կամ այն լիազօրութիւնն իրականացնելը քրեօրէն պատժելի է։
Ինչ-որ հրամանագրով Արցախի Հանրապետութիւնը լուծարուած լինելու հարցին լուրջ վերաբերողների համար եւ յետագայ շահարկումներից խուսափելու նպատակով Երեւան տեղափոխուելուց յետոյ Արցախի Հանրապետութեան նախագահ Սամուել Շահրամանեանը կայացրել է ստորեւ հրապարկուած մէկ այլ հրամանագիր, որով նոյն հարթակում անուաւեր է ճանաչուել 2023 թուականի սեպտեմբերի 26-ին ստորագրուած Արցախը լուծարելու մասին հրամանագիրը։
Այս մասին Սամուել Շահրամանեանը պաշտօնական նամակով տեղեկացրել է Հայաստանի Հանրապետութեան իշխանութեանը:
Չնայած ո’չ այս եւ ո’չ էլ Արցախը լուծարելու վերաբերեալ հրամանագրերը որեւէ իրաւական ուժ չունեն, երկուստեք հակասում են թէ՛ Արցախի մայր օրէնքին, թէ՛ հրամանագրից բարձր իրաւաբանական ուժ ունեցող այլ իրաւական ակտէրի դրոյթներին, ուժի մէջ չէն մտել եւ հետեւաբար որեւէ հետեւանք անգամ առաջացնել չէն կարող, այնուամենայնիւ, հրապարակում եմ ԱՀ նախագահի 659-Ն հրամանագիրը՝ բոլորին խնդրելով Արցախը լուծարուած լինելու մասին այլեւս չխօսել։
Յիշեցնում եմ նաեւ, որ Ադրբեջանը մօտ 30 տարի Շուշիի, Աղդամի եւ այլ համայնքների ղեկավարներ է ունեցել, ուստի տարածքային կորստով Արցախի էջը փակուած մի’ համարեք։
Մենք մերը հետ ենք ստանալու։
