Մայիսի 9–ին Հանրային հեռուստաընկերութեան եթերում ռազմական Արծրուն Հովհաննիսեանը Երկրորդ համաշխարհային պատերազմի հետ կապուած աղմկահարոյց յայտարարութիւններ է արել։
Գլխաւոր դատախազ Աննայ Վարդապետեանը պէտք է իրաւական ուսումնասիրութիւն եւ գնահատական հնչեցնի ՀՀ պաշտպանութեան նախարարութեան ներկայացուցիչ Արծրուն Հովհաննիսեանի յայտարարութիւններին։ Այդ մասին այսօր Ազգային ժողւում իր ելոյթում նշեց «Հայաստան» խմբակցութեան քարտուղար Արծուիկ Մինասեանը։
Մայիսի 9–ին Հանրային հեռուստաընկերութեան եթերում Վազգէն Սարգսեանի անուան ռազմական ակադեմիայի Հրամանատարաշտաբային ինստիտուտի պետ, ՊՆ նախկին մամուլի խօսնակ Արծրուն Հովհաննիսեանն ասել էր, թէ Երկրորդ համաշխարհային պատերազմի հետ կապուած Հայաստանի համար ամենածանր միֆերից մէկը Ստալինգրադի ճակատամարտով իբր Հայաստանի փրկութիւնն է թուրքական ներխուժումից։ Նա նշել էր, որ Գերմանիան ունեցել է ծրագիր` Ստալինգրադից յետոյ իջնել եւ վերցնել Կովկասը, ապա գրաւել Թուրքիան, որն էլ ենթադրելու էր միացեալ պատմական Հայաստանի ստեղծում։
«Գլխաւոր դատախազը կոնկրէտ անելիք ունի 44–օրեայ կեղծ լուրերի մունետիկի` Արծրուն Հովհաննիսեանի յայտարարութիւնների վերաբերեալ։ Նա պէտք է իրականացնի իրաւական ուսումնասիրութիւն եւ գնահատական հնչեցնել յատկապէս այս առումով` մարդկութեան դէմ իրականացուած յանցագործութիւն կատարած նացիստական Գերմանիայի եւ Հիտլերի կառավարման ռեժիմն արդարացնելու կամ վտանգաւորութիւնը մեղմացնելուն ուղղուած գործողութիւններով ու այն էլ` ոչ աւելի, ոչ պակաս խեղաթիւրելով ողջ պատմութիւնը»,– յայտարարեց Մինասեանը։ Բացի այդ, ըստ պատգամաւորի` Արծրուն Հովհաննիսեանը հայերի էմոցիոնալ ֆոնը բարձրացնելու համար ասել է, թէ հիտլերեան Գերմանիան անկախ ու պատմական Հայաստան էր ուզում։ Ըստ Մինասեանի` սրանք անընդունելի յայտարարութիւններ են։
