Մհեր Մելքոնեան
Հայկական ԽՍՀ Գերագոյն խորհրդի եւ Լեռնային Ղարաբաղի Ազգային խորհրդի որոշումը Հայկական ԽՍՀ-ի եւ ԼՂԻՄ-ի վերամիաւորման մասին
1 դեկտեմբեր, 1989թ.
Հիմնուելով ազգերի ինքնորոշման համամարդկային սկզբունքների վրայ եւ արձագանքելով հայ ժողովրդիբռնութեամբ տարանջատուած երկու հատուածների վերամիաւորման օրինական ձգտմանը Հայկ. ԽՍՀ Գերագոյն խորհուրդը եւ ԼՂԻՄ Ազգային խորհուրդը որոշում են.
- Հայկ. ԽՍՀ Գերագոյն խորհուրդը ճանաչում է ԼՂԻՄ-ի ինքնորոշման փաստը` հաստատուած ԼՂԻՄ-ի մարզային խորհրդի 1988թ. փետրուարի 20-ի եւ յուլիսի 12-ի նստաշրջանների, ինչպէս նաեւ մարզի բնակչութեան լիազօր ներկայացուցիչների 1989թ. օգոստոսի 16-ի համագումարի եւ Ազգային խորհրդի հոկտեմբերի 19-ի նիստի որոշումներում:
- Հայկ. ԽՍՀ Գերագոյն խորհուրդը ճանաչում է ԼՂԻՄ լիազօր ներկայացուցիչների համագումարը եւ նրա ընտրած Ազգային խորհուրդը
որպէս մարզիներկայում գործող միակ օրինական իշխանութիւն: - Հայկ. ԽՍՀ Գերագոյն խորհուրդը եւ ԼՂԻՄ Ազգային խորհուրդը հռչակում են Հայկ. ԽՍՀ-ի եւ ԼՂԻՄ-ի միաւորումը: ԼՂԻՄ բնակչութեան վրայ տարածւում են Հայկ. ԽՍՀ-ի քաղաքացիական իրաւունքները:
- Հայկ. ԽՍՀ Գերագոյն խորհուրդը եւ ԼՂԻՄ Ազգային խորհուրդը ստեղծում են համատեղ յանձնաժողով (իր աշխատանքային ապարատով)` Հայկ. ԽՍՀ-ի եւ ԼՂԻՄ-ի վերամիաւորումն իրականացնելու ուղղութեամբ գործնական քայլեր մշակելու համար:
- Հայկ. ԽՍՀ Գերագոյն խորհուրդը եւ ԼՂԻՄ Ազգային խորհուրդը պարտաւորւում են ներկայացնել Հիւսիսային Արցախի Շահումեանի շրջանի եւ Գետաշենի ենթաշրջանի հայ բնակչութեան ազգային շահերը:
- Հայկ. ԽՍՀ Գերագոյն խորհրդի նախագահութիւնը Հայկ. ԽՍՀ նախարարների խորհրդին եւ ԼՂԻՄ Ազգային խորհրդի նախագահութեանը յանձնարարում է գործադրել սոյն որոշումից բխող բոլոր անհրաժեշտ միջոցառումները` իրականացնելու Հայկ. ԽՍՀ-ի եւ ԼՂԻՄ-ի քաղաքական, տնտեսական եւ մշակութային կառուցուածքների իրական միաձուլումը միասնական պետական-քաղաքական համակարգում:
