«ԱԼԻՔ» – Ո՛չ խաղաղութեան համաձայնագրի փաստաթղթում, ո՛չ էլ Վաշինգտոնում երկու երկրների միջեւ ստորագրւած յայտարարութեան մէջ չի յիշատակւում «միջանցք» անւանումով որեւէ բան, այլ միայն քննարկւում է տրանսպորտային ուղիների բացումը, որոնք Ադրբեջանին կապահովեն Նախիջեւան մուտք գործելու հնարաւորութիւն, մինչդեռ Հայաստանը, իր հերթին, երկաթուղով կը կապւի Իրանի Ջուլֆայի հետ, Isca News-ին տւած հարցազրոյցում յայտարարել է Հայաստանում Իրանի դեսպան Մեհդի Սոբհանին։
«Հայաստանը եւ Միացեալ Նահանգները բանաւոր համաձայնութեան են եկել, այլ ոչ թէ գրաւոր, գրանցել հայ-ամերիկեան համատեղ ձեռնարկութիւն Հայաստանում եւ որոշել օպերատորին եւ ներդրողին նախագծի իրականացման համար, որն ամբողջութեամբ կը լինի Հայաստանի ազգային ինքնիշխանութեան եւ իրաւասութեան շրջանակում եւ կը կարգաւորւի Հայաստանի անվտանգութեան մարմինների, անձնագրային վերահսկողութեան եւ մաքսային ընթացակարգերի կողմից։ Ըստ համաձայնագրի՝ դա իւրատեսակ օպերատորութիւն կը լինի, այլ ոչ թէ երթուղու տիրապետում»,- ընդգծել է Իրանի դեսպանը։
Ըստ դիւանագէտի՝ Ադրբեջանի եւ Հայաստանի միջեւ յայտարարութեան տեքստը, որի մանրամասները երկու երկրները պէտք է քննարկեն ապագայում, լիովին հաշւի է առնում Իրանի Իսլամական Հանրապետութեան կողմից ցանկալի հինգ սկզբունքները, «ներառեալ ազգային ինքնիշխանութեան յարգանքը, սահմանների ամբողջականութեան յարգանքը, իրաւասութիւնը, փոխադարձութիւնը եւ սահմանների անձեռնմխելիութիւնը, ուստի դրա վերաբերեալ անհանգստանալու որեւէ պատճառ չկայ»։
Իրանցի բարձրաստիճան դիւանագէտը որպէս օրինակ բերել է Երեւանի օդանաւակայանը, որը պատկանում է Հայաստանի կառավարութեանը, եւ անձնագրային վերահսկողութիւնը, մաքսային ընթացակարգերը եւ անվտանգութեան ստուգումները իրականացնում է կառավարութիւնը, սակայն օդանաւակայանի կառավարումը փոխանցւել է ներդրումային ընկերութեան, ուստի համաձայնեցւած տարանցիկ երթուղու համար «99 տարւայ վարձակալութիւն» անւան տակ օգտագործւած արտայայտութիւնները սխալ են։
