Կառավարութեան ղեկավարի հակաեկեղեցական պահուածքը, ազգային արժէքների եւ Եկեղեցու դէմ նախաձեռնած գործընթացները յղի են կործանարար հետեւանքներով․
Մայր Աթոռ
Մայր Աթոռ Սուրբ Էջմիածնում տեղի ունեցաւ Գերագոյն հոգեւոր խորհրդի ժողով
Հունիսի 2-ին Մայր Աթոռ Սուրբ Էջմիածնում, նախագահութեամբ Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսի, տեղի ունեցաւ Գերագոյն հոգեւոր խորհրդի ժողով, որին մասնակցում էին եպիսկոպոսներ եւ թեմակալ առաջնորդներ Հայաստանից ու սփիւռքից։
Ժողովում քննարկուեցին հայրենիքին առջեւ ծառացած մարտահրաւէրներին, եկեղեցի-պետութիւն յարաբերութիւններին եւ հասարակութիւնը հուզող մի շարք հիմնախնդիրներին առնչուած հարցեր։
Մասնաւոր անդրադարձ կատարուեց վարչապետի կողմէ վերջին օրերին հրահրուած հակաեկեղեցական ամօթալի արշաւին։ Այս կապակցութեամբ Գերագոյն հոգեւոր խորհուրդը հանդէս եկաւ յայտարարութեամբ։
ՅԱՅՏԱՐԱՐՈՒԹԻՒՆ
Հայաստանի վարչապետը՝ պետական այրին անհարիր բառապաշարով, վիրաւորանքներով եւ մեղադրանքներով, հերթական արշաւն է սկսել ընդդէմ Հայաստանեայց Առաքելական Սուրբ Եկեղեցու՝ օրէնքից վեր դասելով իր անձը։
Հայհոյախառն, անվայել խօսոյթներով հախուռն հրապարակումները զուրկ են բարեկրթութեան տարրական նորմերից, ոտնահարում են մարդու հիմնարար իրաւունքները, կոպտօրէն վիրաւորում են հաւատացեալների կրօնական զգացմունքները եւ սքողւում կեղծ սրտացավութեան հիմնավորումներով։
Եկեղեցամարտ այս կեցուածքը ակնյայտօրէն թելադրուած է քաղաքական նպատակներով եւ փորձ է նսեմացնելու ազգային կեանքում եւ միջազգային շրջանակներում յարգանք վայելող Հայոց Եկեղեցու եւ եկեղեցականաց հեղինակութիւնը, լռեցնելու Եկեղեցու ձայնը եւ նուազեցնելու նրա հանրային ազդեցութիւնը։ Կառավարութեան ղեկավարի հակաեկեղեցական պահուածքը, ազգային արժէքների եւ Եկեղեցու դէմ նախաձեռնած գործընթացները հղի են կործանարար հետեւանքներով եւ սպառնալիք՝ հայոց պետականութեանը, մեր ժողովրդի միաբանութեանը թէ՛ հայրենիքում եւ թէ՛ սփիւռքում։ Այսպիսի գործողութիւնները պառակտում են հասարակութիւնը, տկարացնում են ազգի ոգին եւ հայրենանուիրումի բարձր գիտակցութիւնը՝ մանաւանդ առկայ մարտահրաւէրների պայմաններում։ Նման դատապարտելի ձեռնարկումները սպասարկում են արտաքին հայատեաց ուժերի նկրտումները՝ որոշակիօրէն կապուելով ադրբեջանական քարոզչամեքենայի կողմէ հայ ժողովրդին եւ Հայ Եկեղեցուն ուղղուած զրպարտութիւնների եւ կեղծ մեղադրանքների հետ։
Հայոց Եկեղեցին՝ գիտակից իր հանձնառութիւններին, անշեղօրէն շարունակելու է հոգեփրկչական եւ ազգապահպան առաքելութիւնը՝ ընդդիմանալով ազգավնաս ու կործանարար ընթացքներին եւ մշտապէս հետամուտ լինելով պետութեան ու ազգի գերագոյն շահերի, մեր սրբազան արժէքների պաշտպանութեան։
Եկեղեցու հարցերը լուծւում են եկեղեցական կարգերի ու կանոնների համաձայն եւ դուրս են պետական եւ քաղաքական գործիչների իրաւասութիւնից։ Հայաստանեայց Առաքելական Սուրբ Եկեղեցին մէկ ամբողջութիւն է՝ իր հաւատացեալ զաւակներով եւ զինուորագրեալ հոգեւորականներով՝ ի գլուխ ունենալով ազգընտիր Ամենայն Հայոց Հայրապետը։ Կոչ ենք ուղղում իրաւասու պետական մարմիններին՝ կասեցնելու վարչապետի այս անօրէնական եւ անհեռատես քաղաքականութիւնը։ Հարկ չկայ Եկեղեցին ներգրաւելու արհեստական օրակարգերի մէջ եւ մղելու հակադարձման գործողութիւնների։
Այս նոր փորձութեան հանդիման՝ հորդորում ենք մեր Սուրբ Եկեղեցու հաւատաւոր զաւակներին լինել միաբան ու միասնակամ, առ Հայրենին եւ Սուրբ Եկեղեցին հաւատարմութեամբ ու զորեղ հաւատքով յաղթահարել մեր ժողովրդի առջեւ ծառացած բոլոր մարտահրաւէրները եւ երբեք թոյլ չտալ մեր ազգային հիմնասիւնների սասանումը։ Թող այս մերժելի մեքենայութիւնները պատճառ չդառնան յուսախաբութեան եւ գայթակղութեան։
Աղօթում ենք առ Փրկիչ մեր Տէրը՝ Յիսուս Քրիստոս, որ վնասաբեր երեւոյթներով չխաթարուի հայրենական կեանքը, եւ աշխարհասփիւռ մեր ժողովուրդը ապրի խաղաղութեան, բարօրութեան եւ առաջընթացի մէջ։ Թող Տէրը անսասան պահէ հայոց պետականութիւնը եւ պայծառ՝ Հայաստանեայց Առաքելական մեր Սուրբ Եկեղեցին եւ Մայր Աթոռ Սուրբ Էջմիածինը՝ հաւատաւոր իր բոլոր զաւակներով։
