ՀՅԴ Գանատայի երիտասարդական միութեան յայտարարութիւն
Հայաստանեայց առաքելական եկեղեցին ու հայութեան ազգային խորհրդանիշները կը մնան սիւները հայկական պետականութեան։ ՀՅԴ Գանատայի Երիտասարդական միութիւնը (ԳԵՄ) կու գայ հաստատելու, թէ Հայ Յեղափոխական Դաշնակցութիւնը եղած է ու կը մնայ հայրենիքը պաշտպանող վահանն ու պատուարը։
Դաշնակցականին զէնքը հայ ժողովուրդի արդար իրաւունքներուն տիրանալու իր հաւատքն ու կամքն է։ Ձերբակալութիւնն ու հալածանքը դաշնակցականի լուման են մեր երկարամեայ պայքարի զոհողութեան սեղանին։
Կոչ կ՚ուղղենք բոլորին յիշելու ՀՅԴ հիմնադիր Քրիստափոր Միքայէլեանի խօսքերը. «Ո՛չ մի բռնութիւն, ո՛չ մի հալածանք, ո՛չ մի սահման չի կարող բաժանել մի ժողովուրդ, եթէ նա տոգորուած է ընդհանուր շահերի գիտակցութեամբ, ունի նաեւ կռուելու անսասան վճռողականութիւն եւ կապուած, միացած է դարերով սնուած ու պահպանուած ընդհանուր բնազդների ու զգացմունքների առողջ զարկերով»։
ՀՅԴ Գանատայի Երիտասարդական միութիւնը իր անվերապահ զօրակցութիւնը կը յայտնէ ՀՅԴ Հայաստանի Երիտասարդական Միութեան մեր ընկերներուն, որոնք այսօր հալածանքի կ՚ենթարկուին Հայաստանի Հանրապետութեան իշխող վարչախումբին կողմէ։
ՀՅԴ Գանատայի Երիտասարդական միութիւն
