ՀՅԴ Բիւրոյի յայտարարութիւնը
Յունիսի լոյս 13-ի գիշերը Իսրայելի ռազմաօդային ուժերը զանգուածային հարուածներ են հասցրել Իրանի Իսլամական Հանրապետութեանը՝ թիրախաւորելով միջուկային էներգիայի ենթակառուցուածքների օբյեկտները, զինուորական հրամանատարութեանը, գիտնականների, քաղաքացիական շինութիւններ եւ ենթակառուցուածքներ։
Իրանի դէմ Իսրայելի յարձակումն ու ռազմական ծաւալուն գործողութիւնները, հակասում են ՄԱԿ-ի կանոնադրութեանը, միջազգային իրաւունքին եւ հարուածի տակ են դնում խաղաղ ազգաբնակչութեան կեանքի իրաւունքը։
Մերձաւոր Արեւելքում ծաւալուող ռազմական գործողութիւնների եւ աշխարհաքաղաքական շարունակական ցնցումների համատեքստում Իսրայելի գործողութիւնները խիստ մտահոգիչ են, յղի անկանխատեսելի զարգացումներով։
Իրավիճակի յետագայ ծաւալումն անխուսափելի բացասական հետեւանքներ կը թողնի, յատկապէս՝ խաթարելով տարածաշրջանի խիստ փխրուն կայունութիւնը, անվտանգութիւնն ու խաղաղութիւնը։
Խիստ մտահոգուած ստեղծուած իրավիճակով, ՀՅԴ Բիւրոն դատապարտում է Իրանի եւ Իրանի ժողովրդի դէմ Իսրայելի գործողութիւնները եւ անընդունելի համարում միջպետական խնդիրները ռազմական ճանապարհով լուծելու քաղաքականութիւնը։
Ցաւակցում ենք զոհուածների հարազատներին եւ համոզում յայտնում, որ լայնածաւալ պատերազմից խուսափելու լաւագոյն ճանապարհը բանակցային գործընթացն է։
ՀՅԴ Բիւրօ
Յունիս 14․ 2025
