«Հրապարակ» թերթը գրում է. «Վերջին շրջանում ընդդիմութեան, եկեղեցու, լրագրողների, առհասարակ՝ իրենց քննադատողների նկատմամբ ագրեսիւ տրամադրուած իշխանութիւնը որոշել է իշխանափոխութեան ցանկացած քայլ խեղդել օրօրոցում։ Որոշ տեղեկութիւններով՝ Նիկոլ Փաշինեանը հրայեանգել է գտնել իրաւական ձեւակերպում եւ կալանաւորել դաշնակցական Հրանտ Մարգարեանին՝ օրերս արուած մի յայտարարութեան համար։
Օրեր առաջ Հրանտ Մարգարեանը ԶԼՄ-ներից մէկին տուած հարցազրոյցի ժամանակ ասել է, որ Հոկտեմբերի 27-ը եւ Նոյեմբերի 9-ը «պոռթկում» էին, եւ չի բացառել, որ դա կարող է կրկնուել։ Հնարաւոր է՝ Նիկոլ Փաշինեանի գրպանային իրաւապահները մեծ շուքով «պետական ահաբեկչութիւնը կանխելու» թատրոն բեմադրէն եւ ձերբակալէն դաշնակցական գործչին՝ այդպիսով կանխելով նմանատիպ յայտարարութիւնները, առաւել եւս՝ փորձերը։
Եթէ մի քանի անհասկանալի անհատների ցուցմունքով պատերազմի հերոս Ռուստամ Գասպարեանի եղբայրը՝ Սերոբ Գասպարեանն արդէն գրեթէ մէկ տարի կալանաւորուած է՝ յօրինուած մեղադրանքով, ոչինչ չի խանգարի, որ ՀՅԴ նախկին ներկայացուցչին էլ բանտ ուղարկէն։
