Գիւմրիում տեղի է ունենում Նիկոլի կողմից ՏԻՄ-ի զաւթման փոքրիկ, բայց մեծանալու միտում ունեցող գործընթաց:
Ապրիլի 21-ին «Մեր քաղաքը» դաշինքի հէնքի վրայ ձեւաւորուած համանուն խմբակցութեան անդամ Կարէն Բադալեանը հրաժարականի դիմում է ներկայացրել, ինչի մասին համայնքի ղեկավարը օրէնքով սահմանաւած կարգով արձանագրութիւն է կազմել ու տեղեկացրել Ընտրատարածքային ընտրական յանձնաժողովին:
Ըստ օրէնքի եւ կարգի, պէտք էր, որ աւագանու անդամ դառնար ըստ ցուցակի յաջորդ անդամը: Ըստ փաստաբան Սոս Յակոբեանի՝ տեղի է ունեցել խախտում. ԸԸՀ-ն օրէնքով սահմանուած կարգով 7-օրեայ ժամկէտում չի կազմել արձանագրութիւն աւագանու անդամի լիազօրութիւնները դադարեցնելու մասին, եւ այդ հարցը առկախուած է մինչ օրս: Երեկ վերջին օրն էր օրէնքով սահմանուած ժամկէտի, որի ընթացքում պէտք էր «Մեր քաղաքը» խմբակցութեան անդամ Կարէն Բադալեանի լիազօրութիւնները դադարեցուեին, եւ մանդատը փոխանցուեր յաջորդ անձին՝ Նարեկ Միրզոյեանին:
Նիստը հրաւիրել են, հարցը քննարկել են, սակայն նիստը ընդհատուել է, որպէսզի այսօր շարունակուի, ինչը, սակայն, տեղի չի ունենում: Ըստ Սոս Յակոբեանի՝ ԸԸՀ-ն, իշխանութիւնների հետ համագործակցութեամբ եւ թելադրանքով, ունենալով ԿԸՀ-ի հովանաւորութիւնը, իրականացնում է ՏԻՄ մարմնի խափանման աշխատանք, ինչը նաեւ պարունակում է յանցագործութեան յատկանիշներ:
Ըստ Սոս Յակոբեանի՝ առկայ է նաեւ տեղեկատուութիւն, որ Կարէն Բադալեանը դիմել է նաեւ դատարան՝ ցանկանալով անուաւեր ճանաչել քաղաքապետի արձանագրութիւնը: Ըստ տեղեկութիւնների՝ Կարէն Բադալեանը դիմում ներկայացնելուց երկու օր յետոյ բոլորին անյայտ հանգամանքներում նորից դիմում է գրել եւ ցանկացել մնալ աւագանու անդամ՝ դուրս գալով «Մեր քաղաքը» խմբակցութիւնից: Ըստ փաստաբանի՝ Կարէն Բադալեանի այս վարքագիծը տեղի է ունեցել աւագանու անդամի կամքի վրայ ազդեցութեան արդիւնքում, ինչը փաստաբանն անուանեց նաեւ հոգեբանական բռնութիւն:Ըստ Սոս Յակոբեանի՝ ի տարբերութիւն ԱԺ-ի, աւագանու անդամը չի կարող փոշմանել եւ հետ վերցնել դիմումը: Չկայ նման ընթացակարգ:
Հետեւաբար, այս պահին պէտք է մուտք արուի Գիւմրու քաղաքապետի արձանագրութիւնն ու մանդատի փոխանցում լինի, ինչը եւ չի արւում, քանի որ, ինչպէս հասկացանք, ԸԸՀ նախագահը չի ներկայացել:
Ես արդէն չգիտեմ ինչ բառերով որակել էս ամենը…
