Հայրենիքի նկատմամբ անսակարկ սիրով եւ ազգային նկարագրով երիտասարդն է հայրենիքի ամրութիւնը
Յուլիսի 20-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնում ընդունեց Հայ Յեղափոխական Դաշնակցութեան երիտասարդական եւ ուսանողական 12-րդ Համահայկական բանակումի մասնակիցներին՝ ուղեկցութեամբ ՀՅԴ Բիւրոյի անդամ Յովսէփ Տէր-Գէորգեանի եւ ՀՅԴ Հայաստանի ԳՄ անդամ Գեղամ Մանուկեանի։
Հանդիպմանը տիար Յովսէփ Տէր-Գէորգեանը, հայցելով Ամենայն Հայոց Հայրապետի օրհնութիւնը, ընդգծեց, որ այս տարւայ ՀՅԴ Համահայկական բանակումը իրականացւում է «Պիտի վերադառնանք» կարգախօսով, ինչը կարեւոր ուղերձ է՝ վերադառնալու մեր արմատներին ու մեր հոգեւոր-ազգային արժէքներին։
Այնուհետեւ Նորին Սրբութիւնն իր հայրական օրհնութիւնը բերեց ներկաներին, գնահատանք յայտնելով ՀՅԴ Երիտասարդական եւ Ուսանողական միութիւնների պատասխանատուներին տարբեր երկրներից հայորդիներին հայրենիքում պարբերաբար համախմբելու համար, ինչը լաւագոյն առիթ է զօրացնելու նրանց ազգային-հոգեւոր նկարագիրը եւ նւիրումն առ հայրենին։
Վեհափառ Հայրապետը, խօսելով ազգային ինքնութիւնը անխաթար պահելու եւ հոգեւոր արժէքներով առաջնորդւելու հրամայականի մասին, ընդգծեց, որ հայրենիքի նկատմամբ անսակարկ սիրով ու ազգային նկարագրով երիտասարդն է հայրենիքի ամրութիւնը եւ ազգի յարատեւութիւնը։
Անդրադառնալով Արցախի բռնազաւթման, հայրենազրկւած արցախահայութեան իրաւունքների պաշտպանութեան եւ Ադրբեջանում մինչ օրս պահւող հայ գերիների վերադարձման, Արցախի հայկական հոգեւոր-մշակութային ժառանգութեան պահպանութեան խնդիրներին ու երկրում տիրող դժւարին կացութեանը՝ Հայոց Հայրապետը կարեւորեց ազգային միաբանութիւնը՝ ի սէր հայրենիքի եւ յանուն համազգային շահերի ու առկայ մարտահրաւէրների յաղթահարման։
Վերջում Նորին Սրբութիւնը մաղթեց, որ ազգասիրութեան զօրեղ ոգին ու կամքը մշտապէս ուղեկից լինեն հայ երիտասարդներին՝ համընդհանուր ճիգերով զօրացեալ կերտելու հայրենքի անվտանգութիւնը, մեր ժողովրդի խաղաղ ու բարօր կեանքը։
Մայր Աթոռ Սուրբ Էջմիածնի մամլոյ ծառայութիւն
