Արցախի նախկին ՄԻՊ Արտակ Բեգլարեանը դատապարտում է Կրեգ Օլիֆանտի այցը Հայաստան

«Յայտարարութիւն՝ Yerevan Dialogue համաժողովին Կրեգ Օլիֆանտի մասնակցութեան անընդունելիութեան վերաբերեալ» վերտառութեամբ յայտարարութիւն է տարածել Արցախի Հանրապետութեան նախկին ՄԻՊ Արտակ Բեգլարեանը։

Այն ներկայացնում ենք ստորեւ.

Մենք՝ ներքոստորագրեալ իրաւապաշտպաններս եւ քաղհասարակութեան ներկայացուցիչներս, խստօրէն դատապարտում ենք ՀՀ արտաքին գործերի նախարարութեան կողմից կազմակերպուող Yerevan Dialogue համաժողովի շրջանակում Կրեգ Օլիֆանտի (Craig Oliphant) այցը Հայաստան, ով այս տարուայ ապրիլ ամսին օկուպացուած Ստեփանակերտում մասնակցել է ադրբեջանական ֆորումի։

Կրեգ Օլիֆանտը (Craig Oliphant), հանդիսանալով Մեծ Բրիտանիայի Արտաքին քաղաքականութեան կենտրոնի աւագ խորհրդատու (Senior Adviser, Foreign Policy Centre), ս.թ. ապրիլի 7-10-ը, որպէս խօսնակ, մասնակցել է ադրբեջանական Ադայ համալսարանի 7-րդ քաղաքական ֆորումին , որն անց է կացուել օկուպացուած Ստեփանակերտում՝ Արցախի պետական համալսարանի շէնքում։

Մինչ հայ իրաւապաշտպաններն ու քաղհասարակութեան անդամները բոլոր ջանքերը գործադրում են խստօրէն դատապարտելու նման անձանց այցը էթնիկ զտումների ենթարկուած Արցախ եւ, առաւել եւս, նման միջոցառումների անցկացումը այնտեղ, ՀՀ ԱԳՆ-ն ինքն է հրաւիրում այդ անձանց Երեւան՝ լուռ ընդունելով եւ ողջունելով նման այցերի թոյլատրելիութիւնը։

Պահանջում ենք ՀՀ ԱԳՆ-ից յստակ պարզաբանում տալ, թէ ինչու է նշուած անձը հրաւիրուել Yerevan Dialogue համաժողովին, ինչպէս նաեւ անյապաղ կերպով չեղարկել այդ անձի մասնակցութիւնը նշուած միջոցառմանը:

Արտակ Բեգլարեան, «Արցախ Միութիւն» ՀԿ,

Սիրանուշ Սահակեան, «Միջազգային եւ համեմատական իրաւունքի կենտրոն» ՀԿ,

Արաքս Մելքոնեան, «Իրաւունքների պաշտպանութիւն առանց սահմանների» ՀԿ,

Արայ Ղազարեան, փաստաբան,

Արփի Աւէտիսեան, իրաւապաշտպան,

Արման Թաթոյեան, «Իրաւունքի եւ Արդարութեան կենտրոն «Թաթոյեան» հիմնադրամ»,

Գեղամ Ստեփանեան, Արցախի Հանրապետութեան Մարդու իրաւունքների պաշտպան

Գառնիկ Քերքոնեան, «Հայ իրաւական պաշտպանութեան ճակատ»:

Յայտարարութիւնը բաց է ստորագրման համար։