Հինգշաբթի, յունուարի 22-ին, ՀՅԴ «Նիկոլ Աղբալեան» կոմիտէութեան նախաձեռնութեամբ, Բըրբանքի «Բեշիր Մարտիրոսեան» երիտասարդական կենտրոնում տեղի ունեցաւ Արցախի թեմայով կինոռեժիսոր Ջիւան Աւետիսեանի «Դրախտի դարպասը» ֆիլմի ցուցադրութիւնը ։
Ֆիլմի ցուցադրութիւնը մեծ հետաքրքրութիւն առաջացրեց ներկաների շրջանում՝ յատկապէս երիտասարդների, որոնք հնարաւորութիւն ունեցան արուեստի միջոցով վերապրելու ու վերաիմաստաւորելու Արցախի շուրջ ընթացող ողբերգական իրադարձութիւնները։
Ֆիլմի ցուցադրութիւնից յետոյ տեղի ունեցաւ հանդիպում եւ հարց ու պատասխան ռեժիսոր Ջիւան Աւետիսեանի հետ։ Քննարկման ընթացքում անդրադարձ կատարուեց ֆիլմի գաղափարական առանցքին, ստեղծման ընթացքին, ինչպէս նաեւ արուեստի դերին ազգային յիշողութեան պահպանման եւ ճշմարտութեան բարձրաձայնման գործում։ Ռեժիսորը պատասխանեց ներկաների հարցերին՝ բացելով ֆիլմի խորքային շերտերն ու իր ստեղծագործական մօտեցումները։
Հանդիպման աւարտին Ջիւան Աւետիսեանը ներկայացրեց Արցախի թեմայով իր առաջիկայ նախագիծը՝ «2020-ի հրեշտակները», ընդգծելով, որ մշակութային պայքարը շարունակական է եւ պարտադիր՝ յատկապէս մեր օրերում։
Միջոցառմանը ներկայ էին ՀՅԴ Բիւրոյի անդամ Տարօն Տէր Խաչատրեանը եւ ՀՅԴ Ամերիկայի Արեւմտեան «Կարսի» շրջանի Կենտրոնական Կոմիտէի ներկայացուցիչ Կարօ Մատէնլեանը, որոնց ներկայութիւնը եւս մէկ անգամ ընդգծեց նախաձեռնութեան քաղաքական եւ ազգային կարեւորութիւնը։
Միջոցառումն անցաւ ջերմ, մտահոգ եւ բովանդակալից մթնոլորտում՝ վերահաստատելով, որ նման մշակութային ու գաղափարական նախաձեռնութիւնները կարեւոր հարթակներ են սփիւռքահայ համայնքի ներսում ազգային ինքնագիտակցութեան պահպանման եւ ամրապնդման համար։
Ռ.Մ.
