ՀՅԴ Բիւրոյի յայտարարութիւնը
Սիրելի՛ հայրենակիցներ,
Այսօր, երբ հաւաքական հայ ժողովուրդն անվտանգային լրջագոյն մարտահրաւէրներ է դիմագրաւում, երբ յաղթահարուած չէն Հայաստանին եւ հայ ժողովրդին ուղղուած գոյութենական սպառնալիքները, երբ ազգային համախմբումն ու միասնականութիւնը կենսական անհրաժեշտութիւն են, իշխող վարչախումբը բացայայտ արշաւ է սկսել Հայաստանեայց Առաքելական Սուրբ Եկեղեցու, նրա Ազգընտիր Հայրապետի եւ Եպիսկոպոսաց դասի նկատմամբ։
Մեր ինքնութեան կարեւորագոյն հիմքերից մէկի նկատմամբ վարչախմբի արգահատելի նպատակադրումներն ու հռետորաբանութիւնն ակնյայտօրէն ապազգային են եւ հակասահմանադրական։
Աներկբայ է, որ զազրելի ցեխարձակումները համընկան արտաքին հարթակներում ազգային շահերի եւ արցախահայութեան իրաւունքների պաշտպանութեան ուղղութեամբ ՀԱԵ նախաձեռնութիւնների հետ։
Ակնյայտ է նաեւ, որ իշխանութիւնների ոտնձգութիւններն յունաւորուեցին թշնամի երկրի «կրօնապետի» անբարոյ եւ ստայօդ յայտարարութիւններին, ինչպէս նաեւ որոշ շրջանակների կողմից Հայաստանում կրօնական ազատութիւնների թեման շահարկելու, Հայոց ազգային եկեղեցու սահմանդրօրէն ամրագրուած պատմական առաքելութիւնն ու կարգավիճակը խաթարող նպատակադրումներին զուգահեռ։
Հայ ժողովրդի կեանքում Հայ եկեղեցու պատմական բացառիկ դերակատարութիւնը չարժեւորելն ու վերջինիս թիրախաւորելը ոչ միայն թշնամական շահեր է սպասարկում, այլեւ խորացնում է երկրում տիրող արժէքային ճգնաժամը, թուլացնում մեր հաւաքական դիմադրողականութիւնը, նսեմացնում հաւատաւոր հայ ժողովրդի նուիրական զգացումներն ու արժանապատուութիւնը։
ՀՅԴ Բիւրոն իր անվէրապահ աջակցութիւնն է յայտնում Հայ Առաքելական Սուրբ Եկեղեցուն, խստօրէն դատապարտում է իշխող վարչախմբի՝ Հայ Եկեղեցու նկատմամբ քայքայիչ, հակապետական գործողութիւնները եւ յայտարարում է, որ համակայկական կառոյցի ողջ կարողականութեամբ եւ միակամութեամբ Հայ Առաքելական Սուրբ Եկեղեցու կողքին է՝ հանուն հայ ժողովրդի հաւաքական իղձերի եւ Հայոց պետականութեան զօրացման։
ՀՅԴ Բիւրօ
Յունիս 10, 2025
