Վերջին օրերին մենք ականատեսն ենք լինում Դաշնակցութեան եւ ՀՅԴ Հայաստանի Երիտասարդական Միութեան նկատմամբ ուղղւած զրպարտչական, վարկաբեկման եւ մանիպուլիատիւ արշաւի, որը ոչ թէ հիմնւած է իրականութեան վրայ, այլ՝ թելադրւած է քաղաքական իշխանութեան կողմից։
Երիտասարդական միութեան անունից խստօրէն դատապարտում ենք այն փորձերը, որոնց նպատակն է վախեցնել, լռեցնել ու ահաբեկել քաղաքականապէս գիտակից, գաղափարական համոզմունքներով առաջնորդւող հայ երիտասարդներին։
Մեր ընկերների նկատմամբ իրականացւող գործողութիւնները՝ անօրինական ձերբակալութիւններ, խուզարկութիւններ, կեղծ մեղադրանքներ, յիշեցնում են խորհրդային ռեպրեսիւ աւանդոյթները։
Երիտասարդներին ձերբակալել խաղային զէնքերի, օրէնքի սահմաններում ազատ վաճառքի դրւած խաղային այլ իրերի ձեռքբերման համար՝ ոչ այլ ինչ է, քան ծաղրի առարկայ դարձնել ուժային եւ յատուկ ծառայութիւններին։
Հրապարակել 135-ամեայ կուսակցութեան՝ գրեթէ նոյն տարիքի կարգախօսով շապիկ եւ պարծենալ «բացայայտւած ահաբեկչական գործողութիւններով»՝ ոչ այլ ինչ է, քան ազգային ամօթ։
Պետական ապարատը՝ դատախազութիւն, քննչական մարմիններ, յատուկ ծառայութիւններ, այս օրերին զբաղւած են ոչ թէ Հայաստանի գլխին կախւած նոր պատերզմի, սպառնալիքների կանխարգելմամբ, հասարակութեան, սահմանների պաշտպանութեան առաւել ամրացմամբ՝ այլ սթրայքբոլի սիրահարների «բացայայտման եւ վնասազրծման» լուրջ ու պատասխանատու աշխատանքով։
Մենք հպարտ ենք մեր ընկերներով, ովքեր պատւի ու սկզբունքի հարց են համարում պայքարը յանուն հայրենիքի, եւ ոչ մի կարծրատիպ, սպառնալիք կամ զրպարտութիւն չի կոտրի այդ կամքը։
ՀՅԴ երիտասարդութիւնը շարունակում է իր գաղափարական, քաղաքական ու կրթական պայքարը՝ պատասխանատւութեամբ, ազնւութեամբ ու համարձակութեամբ։ Իսկ այս շինծու գործընթացները ոչ թէ կը վախեցնեն, այլ նոր համոզմունք ու իմաստ կը տան մեր պայքարին եւ կապահովեն մեր գաղափարական ընկերների եւ համակրների համախմբումը։
ՀՅԴ ՀԱՅԱՍՏԱՆԻ ԵՐԻՏԱՍԱՐԴԱԿԱՆ ՄԻՈՒԹԵԱՆ
ԿԵՆՏՐՈՆԱԿԱՆ ՎԱՐՉՈՒԹԻՒՆ
2025 թ․ յուլիսի 11
