Որեւէ կենտրոնի` Հայաստանի ներքին գործերին միջամտութիւնը մէզ համար անընդունելի է
ՀՅԴ Հայաստանի ԳՄ ներկայացուցիչ Իշխան Սաղաթելեանը անդրադարձել է ԵՄ դիւանագիտութեան ղեկավար Կայա Կալասի երեկուայ յայտարարութեանը․
«Երեկ Եւրոպական Միութեան դիւանագիտութեան ղեկավար Կայայ Կալասը յայտարարել է, որ Հայաստանի իշխանութիւնները դիմել են ԵՄ-ին, խնդրելով աջակցութիւն ընտրութիւնների ժամանակ՝ Մոլդովայի օրինակով կամ փորձով։ Ելնելով այս հանգամանքից, պէտք է արձանագրենք երեք փաստ:
Առաջինը՝ ուղիղ միջամտութիւն է արտաքին ուժերի կողմից Հայաստանի ներքին գործերին: Երկրորդ՝ օրուայ վարչախումբը քաջ գիտակցում է, որ այլեւս չունի ժողովրդի կողմից աջակցութիւն եւ նոյնիսկ պետական վարչական ուժային ռեսուրսները բաւարար չէն իրենց վերարտադրութիւնը ապահովելու համար։
Եւ երրորդ՝ ելնելով այս իրավիճակից, իրենք արտաքին ուժերի միջամտութեամբ, հէնց Մոլդովայի օրինակով, պատրաստւում են առաջիկայում առաջիկայ ընտրութիւններին չէզոքացնել ընդդիմադիր ուժերի մասնակցութիւնը։ Սա է իրական պատկերը Նիկոլ Փաշինեանի իշխանութեան, ժողովրդաւարութեան, անկախութեան եւ ինքնիշխանութեան մասին։
Եւ ամենեւին չզարմանաք, եթէ առաջիկայում Ալիեւը եւ Էրդողանը յայտարարէն, որ տարածաշրջանում կայունութեան եւ խաղաղութիւն հաստատելու համար, Նիկոլ Փաշինեանը դիմել է իրենց՝ ակնկալելով նրանց օգնութիւնն ու աջակցութիւնը Հայաստանում Փաշինեանի վերարտադրութիւնը ապահովելու համար։
Իրականում, Հայաստանի եւ հայ ժողովրդի ճակատագիրը պէտք է որոշի հայ մարդը, եւ որեւէ արտաքին միջամտութիւն, որեւէ արտաքին կենտրոնի մէզ համար անընդունելի է եւ թոյլ չենք տալու»,- յայտարարել է Իշխան Սաղաթելեանը։
