Իսրայէլի կողմից Հայոց Ցեղասպանութեան ճանաչման նախաձեռնութիւնը պէտք է դիտարկել քաղաքական շահերի համատեքստում։ Այս մասին Alpha News-ի հետ զրոյցում նշել է Հայ Յեղափոխական Դաշնակցութեան Արեւմտեան Եւրոպայի Կեդրոնական կոմիտէի ներկայացուցիչ Հրաչ Վարժապետեանը։
«Միամիտ չենք․ ոչ հայութեան կամ Հայաստանի համար են ճանաչում Ցեղասպանութիւնը, այլ իրենց շահերից ելնելով։ Բայց երբ այդ շահերը համընկնում են մեր շահերի հետ, մենք պարտաւոր ենք դա դրական գնահատել»,– ասել է Վարժապետեանը։
Նրա գնահատմամբ՝ Իսրայէլը փորձում է քաղաքական ուղերձ յղել Թուրքիային, եւ այդ հանգամանքը պէտք է օգտագործել յանուն հայկական շահերի՝ առանց թեման շեղելու այլ հարցերի վրայ։
Վարժապետեանը միաժամանակ քննադատել է Հայաստանի իշխանութիւնների մօտեցումը՝ ընդգծելով, որ Հայոց Ցեղասպանութեան թեման «զէնքայնացնելու» մասին յայտարարութիւնները սխալ են, քանի որ հիմնական պայքարը պէտք է ուղղուած լինի թուրքական ժխտողականութեան դէմ։
«Այս հարցում ցանկացած հակառակ դիրքորոշում, ըստ էութեան, ծառայելու է թուրքական քաղաքականութեանը եւ վերածուելու է թուրքահաճոյ յայտարարութեան»,– ընդգծել է նա։
