Մայր Աթոռ Սուրբ Էջմիածինը խստօրէն դատապարտում է Ադրբեջանի իշխանութիւնների կողմից իրականացուող Արցախի հոգեւոր եւ մշակութային ժառանգութեան հետեւողական ոչնչացումը
Վրդովմունքով տեղեկացանք, որ Ադրբեջանի իշխանութիւնները հողին են հաւասարեցրել Ստեփանակերտ քաղաքի Սուրբ Յակոբ եկեղեցին եւ հարակից տարածքում գտնուող խաչքարերն ու կոթողները, որոնք ըստ ադրբեջանական աղբիւրների իբրեւ թէ անօրինական եւ ապամոնտաժման ենթակայ կառոյցներ էին: Խիստ մտահոգիչ են նաեւ Ստեփանակերտի Առաջնորդանիստ Սուրբ Աստուածածին մայր տաճարի ոչնչացման վերաբերեալ ստացուող տեղեկութիւնները։
Մայր Աթոռ Սուրբ Էջմիածինը խստօրէն դատապարտում է Ադրբեջանի իշխանութիւնների կողմից իրականացուող Արցախի հոգեւոր եւ մշակութային ժառանգութեան հետեւողական ոչնչացումը։ Ակնյայտ է, որ Ադրբեջանի իշխանութիւնը շարունակում է թիրախաւորել հայկական քրիստոնեական սրբավայրերը՝ նպատակ ունենալով ջնջել հայկական հետքն Արցախից։
Պետական մակարդակով իրագործուող այս վանդալիզմը հերթական անգամ փաստում է, որ Ադրբեջանի հայատեաց քաղաքականութիւնը որեւէ փոփոխութիւն չի կրել, որով եւ կասկածելի են դառնում Հայաստանի հետ կայուն ու երկարատեւ խաղաղութիւն հաստատելու մասին յայտարարութիւնները։
Մայր Աթոռ Սուրբ Էջմիածինը կոչ է անում ՀՀ կառավարութեան ղեկավարին եւ իշխանութեան ներկայացուցիչներին հրատապ ու գործուն քայլեր ձեռնարկել՝ կանխելու Արցախի հոգեւոր եւ մշակութային ժառանգութեան համակարգուած իւրացումն ու ոչնչացումը։
Կոչ ենք անում նաեւ մշակութային ժառանգութեան պահպանութեամբ, տարածաշրջանում ժողովուրդների խաղաղ համակեցութեամբ եւ փոխգործակցութեամբ շահագրգիռ բոլոր պետութիւններին ու միջազգային կազմակերպութիւններին ազդու միջոցներ ձեռնարկել՝ կասեցնելու մշակութային ոճրագործութիւններն Արցախում։
