ՀՅԴ Հայաստանի Գերագոյն մարմինի ներկայացուցիչ, Հայաստանի Ազգային ժողովի «Հայաստան» խմբակցութեան պատգամաւոր Իշխան Սաղաթէլեան հետեւեալ գրառումը կատարեց Վաղարշապատի ընտրութիւններուն մասին:
«Նախ, պէտք է արժեւորել շուրջ 15000 (47%) քաղաքացիների դիրքորոշումը, ովքեր տեղի չտուեցին ստին ու կեղծիքին, խայտառակ ճնշումներին եւ քուէարկեցին Վաղարշապատի ընտրութիւններին մասնակցող ընդդիմադիր ուժերի օգտին, մասնաւորապէս, «Յաղթանակ» դաշինքի օգտին (շուրջ 32% կամ 10,000 քուէ):
Պէտք է գնահատել նաեւ բոլոր այն ուժերին, ովքեր չխուսափեցին քաղաքական պատասխանատուութիւնից, վաղարշապատցուն ներկայացրին այլընտրանք եւ իրենց ուժերի չափով պայքարեցին գործող վարչախմբին հեռացնելու համար:
Ակնյայտ է, որ.
- իշխող ուժը մէկ համայնքի վրայ կենտրոնացրել եւ օգտագործել է իր միջոցների ողջ պաշարը` վարչականը, ուժայինը, զօրաշարժի է ենթարկել իր ամբողջ զանգուածը եւ կարողացել է ստանալ Վաղարշապատ համայնքում ընտրողների ընդհանուր թուի 21,8 տոկոսը: Ու միայն 45 տոկոս մասնակցութեան պարագայում այդ ձայները կազմել են 48,5 տոկոս,
- որեւէ ընդդիմադիր ուժ չունի հնարաւորութիւն եւ միջոց միայնակ իշխանութիւն ձեւաւորելու, իսկ իշխանութիւնը (նոյնիսկ կցորդ ուժերով) չունի վերարտադրուելու առիթ` յատկապէս ընտրողների բարձր մասնակցութեան պարագայում:
- ընդդիմադիր այն ուժերը, որոնք մասնակցում են ընտրութիւններին, սակայն չեն յաղթահարում անցողիկ շեմը, փոշիացնում են ընդդիմադիր ձայները եւ նպաստում իշխանութեան վերարտադրութեանը:
Այս խնդիրները հաշուի առնելով` ընդդիմադիր ուժերիս անելիքները պէտք է լինեն հետեւեալը.
- բացատրել հանրութեանը ընտրութիւններին մասնակցութեան կարեւորութիւնը, ապահովել բարձր մասնակցութիւն,
- ստեղծել արդիւնաւէտ համակարգ իր մեքանիզմներով, որը կը կարողանայ կանխել կամ նուազեցնել վարչական միջոցների կիրառումը, ընտրախախտումները եւ բռնաճնշումները,
- անցողիկ շէմը յաղթահարելու վտանգ ունեցող ընդդիմադիր ուժերը պէտք է մէկտեղեն իրենց հնարաւորութիւնները, միաւորուեն կամ ընդգրկուեն աւելի խոշոր դաշինքներում:
Այսպիսով, Վաղարշապատի ընտրութիւնները ցոյց են տալիս այն ուղղութիւնները, որոնցով կայ հսկայական անելիք եւ աշխատանք 2026-ին նախատեսուած համապետական ընտրութիւններից առաջ:
Չարախնդալու, մեղաւորներ նշանակելու, շարունակ բողոքելու, մարդկանց յուսալքութեան հասցնելու եւ դրանով սեփական անգործութիւնն ու անպատասխանատու վարքագիծը արդարացնելու փոխարէն պատասխանատու քաղաքական ուժերը եւ գործիչները պէտք է լծուեն վերը նշուած խնդիրները լուծելու գործին:
Մենք գնալու ենք այդ ճանապարհով…»:
